← Ro'yxatdan o'tish · Maxfiylik siyosati

Ommaviy oferta

RivojPOS dasturiy xizmatidan foydalanish shartnomasi · Tahrir: 2026-yil 20-oktabr

1. Umumiy qoidalar

1.1. Ushbu hujjat O'zbekiston Respublikasi Fuqarolik kodeksining 367 va 369-moddalariga muvofiq ommaviy oferta hisoblanadi. Unda yakka tartibdagi tadbirkor Ibroximov Umarbek Ulug'bek o'g'li (keyingi o'rinlarda — Ijrochi) RivojPOS xizmatini taqdim etish shartlari belgilangan.

1.2. Ro'yxatdan o'tish sahifasida "Oferta shartlariga roziman" belgisini qo'yib, kompaniya ochgan jismoniy yoki yuridik shaxs, yakka tartibdagi tadbirkor (keyingi o'rinlarda — Mijoz) ofertani to'liq va so'zsiz qabul qilgan (aksept) hisoblanadi (Fuqarolik kodeksining 370-moddasi). Shu paytdan shartnoma tuzilgan sanaladi.

1.3. Ijrochi ofertani o'zgartirishi mumkin. Yangi tahrir shu sahifada e'lon qilingan kundan kuchga kiradi. Faol obunaga ega Mijoz uchun narx o'zgarishi navbatdagi to'lovdan boshlab qo'llanadi.

2. Atamalar

Xizmat — internet orqali ishlaydigan RivojPOS dasturi: ombor, savdo (kassa), xarid, marketpleyslar bilan integratsiya, hisobotlar va tarifga kiritilgan boshqa bo'limlar.

Kompaniya — Mijoz uchun alohida ma'lumotlar bazasi bilan ochilgan ish maydoni (kompaniya ID orqali kiriladi).

Tarif — Xizmat imkoniyatlari, cheklovlari (omborlar, foydalanuvchilar, tovarlar soni) va oylik narxi to'plami. Amaldagi tariflar ro'yxatdan o'tish va "Sozlamalar → Tarif" sahifalarida ko'rsatiladi.

Sinov muddati — ro'yxatdan o'tgandan keyin beriladigan bepul foydalanish muddati. Uning davomiyligi ro'yxatdan o'tish sahifasida ko'rsatiladi.

3. Shartnoma predmeti

3.1. Ijrochi Mijozga Xizmatdan tanlangan Tarif doirasida foydalanish huquqini (oddiy, mutlaq bo'lmagan litsenziya) beradi, Mijoz esa uning haqini to'laydi.

3.2. Xizmat "qanday bo'lsa, shunday" tamoyili bo'yicha taqdim etiladi. Ijrochi Xizmatning uzluksiz va xatosiz ishlashi uchun oqilona choralar ko'radi, lekin uni kafolatlamaydi.

4. Sinov muddati

4.1. Har bir yangi Kompaniyaga bir marta bepul Sinov muddati beriladi. Bank kartasi talab qilinmaydi.

4.2. Sinov muddati tugagach, to'lov qilinmasa, Kompaniya "faqat o'qish" rejimiga o'tadi: ma'lumotlarni ko'rish mumkin, yangi hujjat kiritish va o'zgartirish yopiladi.

5. Narx va to'lov tartibi

5.1. Xizmat narxi tanlangan Tarif bo'yicha oylik belgilanadi va oldindan to'lanadi. Bir to'lov bilan bir necha oy uchun to'lash mumkin.

5.2. To'lov Ijrochining "Sozlamalar → Tarif" sahifasida ko'rsatilgan bank kartasiga pul o'tkazish yo'li bilan amalga oshiriladi. Mijoz o'tkazma chekini shu sahifaga yuklaydi.

5.3. Ijrochi to'lovni 1 (bir) ish kuni ichida tekshiradi. To'lov tasdiqlangach, obuna avtomatik faollashadi yoki uzaytiriladi.

5.4. Ijrochi hisob-faktura yoki dalolatnomani Mijozning so'rovi bo'yicha taqdim etadi.

6. Pulni qaytarish

6.1. Mijoz to'langan davr boshlanganidan keyin 3 (uch) kun ichida obunadan voz kechsa, to'lov to'liq qaytariladi.

6.2. Bu muddatdan keyin to'liq foydalanilmagan oylar uchun haq qaytariladi. Boshlangan oy uchun to'lov qaytarilmaydi.

6.3. Pul Mijoz to'lov qilgan kartaga yoki Mijoz ko'rsatgan hisobga 10 (o'n) ish kuni ichida qaytariladi.

7. Tomonlarning majburiyatlari

7.1. Ijrochi:

• Xizmatning ishlashini ta'minlaydi va texnik nosozliklarni oqilona muddatda bartaraf etadi;
• Mijoz ma'lumotlarining har kunlik zaxira nusxasini oladi;
• Mijoz ma'lumotlarini Maxfiylik siyosatiga muvofiq himoya qiladi va uchinchi shaxslarga bermaydi (qonunda nazarda tutilgan hollar bundan mustasno);
• rejalashtirilgan texnik ishlar haqida imkon qadar oldindan xabar beradi;
• yordam kontaktlari (Telegram, telefon, email) orqali ish vaqtida murojaatlarga javob beradi.

7.2. Mijoz:

• ro'yxatdan o'tishda to'g'ri ma'lumot beradi;
• login va parollarni sir saqlaydi hamda o'z xodimlarining Xizmatdagi harakatlari uchun javob beradi;
• Xizmatdan qonunga zid maqsadlarda foydalanmaydi, uni buzishga, boshqa kompaniyalar ma'lumotlariga kirishga va ortiqcha yuklama berishga urinmaydi;
• Xizmatga kiritgan ma'lumotlari (jumladan o'z mijozlarining shaxsga doir ma'lumotlari) qonuniy yig'ilgani uchun javob beradi.

8. Ma'lumotlar

8.1. Mijoz Xizmatga kiritgan barcha ma'lumotlar (tovarlar, qoldiqlar, hujjatlar, kontragentlar, mijozlar) Mijozga tegishli.

8.2. Obuna tugaganidan keyin Kompaniya ma'lumotlari kamida 90 (to'qson) kun saqlanadi. Bu muddat ichida Mijoz to'lov qilib ishni davom ettirishi yoki ma'lumotlar nusxasini so'rashi mumkin. Shu muddatdan keyin Ijrochi ma'lumotlarni Mijozga oldindan xabar berib o'chirishi mumkin.

8.3. Obunasi tugaganiga bir necha kun bo'lgan va foydalanilmayotgan Kompaniyaning serveri vaqtincha to'xtatilishi mumkin. Mijoz keyingi safar kirganda u 1–2 daqiqa ichida qayta ishga tushadi, ma'lumotlar saqlanib qoladi.

9. Uchinchi tomon xizmatlari

Xizmat marketpleyslar (Uzum, Ozon, Wildberries va boshqalar), Telegram, fiskal va to'lov tizimlari bilan ularning ochiq API'lari orqali ishlaydi. Ushbu xizmatlarning ishlashi, shartlari va ular o'zgargani uchun Ijrochi javobgar emas. Integratsiya kalitlarini (tokenlarni) Mijoz o'zi kiritadi va ularni yangilab boradi.

10. Javobgarlik

10.1. Tomonlar O'zbekiston Respublikasi qonunchiligiga muvofiq javob beradi.

10.2. Ijrochi bilvosita zararlar, boy berilgan foyda, Mijozning noto'g'ri kiritgan ma'lumotlari va uchinchi tomon xizmatlaridagi nosozliklar uchun javobgar emas.

10.3. Ijrochining har qanday holatdagi javobgarligi Mijoz oxirgi 1 (bir) oy uchun to'lagan summadan oshmaydi.

10.4. Tomonlar engib bo'lmas kuch (fors-major) holatlarida majburiyatlarni bajarmaganlik uchun javobgar emas.

11. Shartnoma muddati va bekor qilish

11.1. Shartnoma aksept qilingan kundan kuchga kiradi va Kompaniya o'chirilgunga qadar amal qiladi.

11.2. Mijoz istalgan vaqtda yordam kontaktlari orqali yozma murojaat qilib shartnomani bekor qilishi mumkin. Pul 6-bo'limga muvofiq qaytariladi.

11.3. Mijoz 7.2-bandni qo'pol buzsa, Ijrochi Kompaniya faoliyatini to'xtatishi mumkin.

12. Nizolarni hal qilish

Nizolar muzokaralar yo'li bilan hal qilinadi. Kelishuvga erishilmasa, nizo O'zbekiston Respublikasi qonunchiligiga muvofiq Ijrochi joylashgan joydagi sudda ko'riladi. Talabnoma (pretenziya) bo'yicha javob muddati — 10 (o'n) ish kuni.

13. Ijrochi rekvizitlari